Facebook

Facebook ye un sitiu web de baldre de redes sociales creáu por Mark Zuckerberg. Orixinalmente yera un sitiu pa estudiantes de la Universidá de Harvard, poro anguaño ta abiertu a toa persona que tenga una cuenta de corréu electrónicu. Los usuarios puen participar nuna o más redes sociales, en rellación cola so situación académica, el so llugar de trabayu o rexón xeográfica. Recibió muncha atención na blogosfera y nos medios de comunicación al convertise nuna plataforma sobre la que terceros puen desendolcar aplicaciones y facer negociu a partir de la rede social. Sicasí, esiste la esmolición alrodiu del so posible modelu de negociu, yá que los resultaos en publicidá reveláronse como bien probes. A mediaos de 2007 llanzó les versiones en francés, alemán y español pa impulsar la so espansión fuera d'Estaos Xuníos, anque los sos usuarios concéntrense mayoritariamente n'Estaos Xuníos, Canadá y Reinu Xuníu. En xineru de 2010, Facebook cuntaba con 380 millones de miembros, y traducciones a 70 idiomes.